Hieronymus Hieronymus, Commentarii, in Ezechielem, 1, 1, 10 Et facta est super eum ibi manus Domini. LXX: Et facta est super me manus Domini. Ut cernere visiones Dei et intelligere possimus, manu et fortitudine Dei super nos opus est. In qua manu et brachio eductus est populus Israel de Aegypto; cuius fortitudinis partem etiam Magi intellexerunt dicentes: Digitus Dei est. Et Salvator in Evangelio: Si ego in digito Dei eiicio daemonia. Pro quo in altero Evangelio scriptum est: Si ego in spiritu Dei eiicio daemonia.