Ioannes Saresberiensis Ioannes Saresberiensis, De Septem, 5, 4 Et ita anima septiformis gratiae Spiritu duce, Deum vicinius contemplatur. Itaque, ut a beato Gregorio percipitur, sic anima gradatim ascendendo reformatur, sic contemplando ad ineffabilem divinae cognitionis accessum usque conducitur. In primo, scilicet humilitatis gradu spiritus timoris Domini animum premit, ne de praesumentibus superbiat, sed illum de sperandorum ferculis aeternorum confortat; in secundo, scilicet mansuetudinis gradu, spiritus pietatis mentis intima occupat, ut ipsam operibus misericordiae repleat; in tertio, scilicet patientiae gradu, spiritus scientiae imaginationem reformat, ut mentem consolidet; in quarto, id est perseverantiae boni operis gradu, spiritus fortitudinis, dum adversitatem ab animo propellit, menti ex opinione fluctuanti rationis confidentiam apponit; in quinto, scilicet largitatis gradu, spiritus consilii, dum rationem, praecipitem esse prohibet, animum et mentem solatii firmitudine replet; in sexto, id est parcimoniae gradu, spiritus intellectus mentis intellectum reficiendo penetrat, et penetrando tenebras eius illustrat; in septimo, scilicet cordis munditiae gradu, spiritus sapientiae memoriam in bonis commemorandis reformat, et ad aeternae veritatis contemplationem et delectationem consolidat.