Augustinus Augustinus, Sermones, 10, 105, 5 Sed opus est ut habeas charitatem, habeas fidem, habeas spem: ut possit tibi dulce esse quod datur. Et haec ipsa tria sunt, fides, spes, charitas. Et haec ipsa dona Dei sunt. Nam fidem ab ipso accepimus: Sicut Deus, inquit, unicuique partitus est mensuram fidei. Et spem ab ipso accepimus, cui dicitur: In quo spem dedisti mihi. Et charitatem ab ipso accepimus, de quo dicitur: Charitas Dei diffusa est in cordibus nostris per Spiritum sanctum, qui datus est nobis. Sed haec itidem tria aliquantulum sunt diversa; sed omnia Dei dona. Manent enim tria haec, fides, spes, charitas: maior autem horum charitas. In illis panibus non est dictus aliquis panis maior aliis: sed simpliciter petiti, et dati tres panes.