Ambrosius Ambrosius, De Fide ad Gratianum Augustum, 1, 15, 96 Facessat igitur et illud, de quo calumniari solent, et discant quemadmodum dictum sit: Dominus creavit me.. Non dixit: Pater creavit, sed Dominus creavit me. Caro Dominum agnoscit, gloria Patrem significat: creatura nostra Dominum confitetur, charitas Patrem novit. Itaque quis ignoret quia ob causam incorporationis hoc dicitur? In eo igitur se creatum dicit, in quo et hominem testificatur dicens: Quid me quaeritis occidere hominem, qui veritatem locutus sum vobis? Hominem dicit, in quo et crucifixus et mortuus, et sepultus est.