Ambrosius Ambrosius, In Psalmum David CXVIII Expositio, 17, 12 Quartus versiculus: Respice in me, et miserere mei, secundum iudicium diligentium nomen tuum. Pulchre addidit: Respice in me, et miserere mei; quia respicit et iratus, ut respexit super castra Aegyptiorum, et ligatis axibus curruum, omnes eos deiecit in fluctus. Respexit super Sodomam et Gomorrham, quarum utraque peccatorum suorum luitura supplicium, divinae pretium solvit offensae. Scriptum est etiam: Aspicit super terram, et facit eam tremere. Et contra, Respexit super munera Abel: super Cain autem munera non respexit. Quo exasperatus Cain, parricidali crimine cruorem fratris effudit.