monumenta.ch > Petrus Blesensis > sectio 6

Word Selection for Searching

Report an Error in this Sectio
Petrus Blesensis, Epistulae, 34, 6
De tua enim potissime miseratione praesumens, aliunde suffragium non exspecto. Memor esto verbi tui servo tuo, in quo mihi spem dedisti . Si illius piae liberalitatis, et meae vocationis affectio perseveret in vobis; sit de beneplacito vestro mihi maturiore nuntio vestram exprimere voluntatem. Patrem siquidem meum, et matrem meam de grege hominum alea fatalitatis exemit, et quos mihi potissime necessarios aestimabam, mors amara prima facie depraedata est, extremae calamitatis exemplum me faciens, et fortunae ludibrium.