monumenta.ch > Hieronymus > sectio 39

Word Selection for Searching

Report an Error in this Sectio
Hieronymus, Commentarii, in Ezechielem, 14, 46, 39
Sin autem et pro ignorantia offertur sacrificium, quanto magis pro delicti conscientia! Unde et Iob offerebat mane quotidie hostiam pro filiis suis , timens ne per ignorantiam deliquissent. Quod autem sequitur: Ut non offerant in atrium exterius, et sanctificetur populus, qui sanctificationi non fuerat praeparatus, illud significat, ne facile non sanctificatis sancta tribuamus: nec mittamus, iuxta Evangelium, margaritas ante porcos, nec demus sanctum canibus . Denique Moyses tribus diebus ab omni immunditia, et ab uxorum complexu vult populum sanctificari, ut accedat ad montem Sina, et sanctificatus sancta suscipiat . Si autem accessuri ad audienda et suscipienda verba Dei, sanctificari iubentur ab uxoribus, manifestum est in Lege illud Apostolicum contineri: Nolite fraudare invicem, nisi forte ex consensu ad tempus, ut vacetis orationi : et ex consensu abstinendum ab uxoribus, ut vacemus orationi.