monumenta.ch > Cassiodorus > sectio 90

Word Selection for Searching

Report an Error in this Sectio
Cassiodorus, Expositio in Psalterium, 3, 118, 90
Narraverunt mihi iniqui fabulationes, sed non ut lex tua, Domine . Iniqui sunt evidenter haeretici, vel Iudaei, quorum perversa loquacitas nescio quas sibi narrare videtur ineptias, quando relicto ordine veritatis, inventionibus probantur studere falsissimis. Haec sunt a lege Domini omnino discrepantia, quando illa veritatem docent, isti nituntur suadere fallacias. Intelligite, dementes, qui a veritate catholica disceditis, dogmata vestra inanibus fabulis comparata. Cui vos placere creditis, cum a Spiritu sancto notatos vos tali nomine sentiatis?