monumenta.ch > Cassiodorus > sectio 31
Word Selection for Searching
Report an Error in this Sectio
Cassiodorus, Expositio in Psalterium, 3, 105, 31
Et ut deiiceret semen eorum in nationibus, et dispergeret eos in regionibus. Hic iustitia Domini praemittitur, ut secuta pietas maiore gloria sentiatur. Dicit enim insurrexisse Domini potestatem, ut in excedentibus vindicaret, eosque in deserto prosterneret, qui praecepta Domini audire noluerunt. Deinde ut semen eorum, id est reliquos eorum humiliatos inter nationes redderet, qui pridem gloriosi cunctis gentibus exstiterunt. Ad postremum inclinatos atque despectos per regiones dispergeret, ne quidquam ulterius de sua congregatione praesumerent.